Сред-село

Уште прв пат кога го видов слоганот „Битола – село!“ кажав „Во Македонија нема поголемо село од Скопје!“

Оние што ме познаваат, знаат дека немам никакви географски определби и врски. Дури не се декларирам ни како Македонец (зависи од друштво и расположение дали ќе бидам Јапонец или Марсовец). Така што да ви е јасно дека горната изјава нема никаква врска со географско-национално-селска пристрасност.

И секој ден, ама буквално секој ден, се наоѓа некој да ми покаже и докаже дека сум во право. Не мора да е нешто големо. Доволно е да видите како некој вади шлајм (или само си потплукнува) на улица, или да видите како комшиите џиткаат ѓубре кај ќе им текне, или да треба во зграда да соберете пари за да се плати поправка на лифтот.

Многу луѓе ја обвинуваат миграцијата село-град за ваквите (не)активности. Онаа што се интензивирала по Земјотресот во Скопје. Големите и болдирани букви не се случајни – еден е Земјотресот во Скопје. Оној што се има случено рано сабајле, на 26ти јули, 1963 година. Се знае и точниот момент на катастрофата: 5 часот и 17 минути. Имаме дури и споменик што го покажува точното време кога се случил Земјотресот – часовникот на Старата железничка станица.

Е сега, се појавува некој си сељак (или селанец, верувам дека и едното и другото се соодветни класификации) и вика дека ќе го рестартира часовникот. И ќе биде „соодветно осветлен“.

Но чекајте! Тоа не е се! Ако се јавите во следните 15 минути, најбрзите 10 ќе добијат и бесплатна песна од македонскиот мелос што ќе го означува секој нов час!

Искрено, повеќе ми се допаѓаше идејата со песна од различна птичка што ја имаше еден часовник на Топ Шоп (сте знаеле дека „Шоп“ е еквивалент на „Сељак“ во некои делови од источна Македонија?).

Се кладиме дека семејството на дилејава се доселило во Скопје по 1963? Со „рестартирањето“ на часовникот сака само да ја избрише трагичната случка што му го овозможила животот во најголемото македонско село. Сигурно го пецка секогаш кога ќе го погледне. Го потсетува на потеклото. На корените. На „семејните вредности“. Она што неговата партија го форсира во јавноста, а ако им ги погледнете приватните животи ќе видите дека… и не се толку семејни.

А знаете кој е изговорот? Демек ако часовникот се рестартира – истиот оној часовник што треба да служи како паметник за сите градежни фирми и издавачи на градежни дозволи во Скопје – тогаш Скопјани (а и пошироката јавност) ќе има впечаток дека нештата се движат. Дека не стоиме во место.

Нека им го каже тоа на оние што сакаат некаде да стигнат со моторно возило на 4 тркала во периодот од 07:00 до 19:00 часот.